Llufan yessawal s tutlayt n tyemmatt !

Deg yiwet n tezrawt ɣef llufanat yesεan ger 3 d 6 wussan deg tudert-nsen, iban-ed d akken llufanat ssawalen s tutlayt n tyemmatt, tinna i wumi sellen imi yellan deg yiεebbaḍ n tyemmatin-nsen. Tazrawt-agi gan-tt imusnawen n "laboratoire des sciences cognitives de l’Ecole normale supérieure de Paris" akk d wid n tesdawit n Würzburg (Allemagne). Imusnawen-agi, smuzgten ugar n 20 n tsaεtin i wsuɣu n 60 llufanat ifransiwen d ilalmaniyen. Ufan llufanat-agi mgarraden deg wsuɣu ; dagi, tzemrem ad teslem ayen d-tekles BBC http://news.bbc.co.uk/2/hi/health/8346058.stm .

Isalli-agi yessaweḍ-it-id weɣmis Figaro n 6 wember 2009. Imi t-ɣṛiɣ, mmektaɣ-d yiwen wemddakel, dagi deg Saint-Denis, yekwan aṭas i wakken arraw-is ad tmeslayen Taqbaylit : Deg wagguren ineggura qbel ad d-tlal yellis tamenzut, yettarra ticeqqufin n Muḥya (Ad fell-as yeεfu) deg wselkim, yetserriḥ-as s wayen deg-s i wakken ad d-tsell Inas deg tεebbuṭ n yemmas ! Ziɣ wellah ar yesεa d lḥeq !!