Win yebγan Ṛebbi ad iweḥḥed
Di Muḥend-U-Mḥend
Meskin iεewj ṛray-is

Yeγra Leqran ijewed
Di zik-is yeğhed
Tura la ireffed s wallen-is

Waqila ssfer iqerb-d
Aεwin ulaḥed
Siwa asebsi d arfiq-is

Si Lḥeṛac armi d Budwaw
Texreb ṭtbiεa-w
Wwiγ-d abrid si timci

Ṛecdeγ a lfahem amussnaw
Tcab lmeḥna-w
teẓad γef medden irkkeli

Tenεet i lkif daεwessu
Ibeddel ṣsura-w
Beεd ccib, tugi ad twali

Si Budwaw ar Tniya
Terkkeb-iyi tnewa
Di tsawent n Tijelabin

Si ṣsbeḥ i nebda lmecya
Tedduγ becwiya
Iṭtij yeγli-d γef tγaltin

Γliγ di lqahwa la laḥya
Seg wakken neεya
Ḍelbeγ smaḥ di Ṣalḥin

Si Tizi γer Mnayel
lmeḥna-w tekmmel
yeṛrez-iyi usebsi nerfa

Ccufṛeγ ikcem-iyi leğhel
lxaṭer-iw ibeddel
qeddmeγ abrid i leḥfa

armi i nccab nḍellel
i yi-ffeγ leεqel
lmeḥna tura i yi-d-stufa

Si Mnayel alarmi d Leεzib
Din i yi-d-yebda ccib
Qedmeγ luḍa n Cendder

lmeḥna-w ur tesεi ṭtbib
teğğa-yi d aγrib
aqli-yi a Llah nesteγfer

la aεwin la asurdi di lğib
ccayen ur neksib
ttif lmut teγzi n leεmer

Si Leεzib armi d Tadmayt
Ṛrwiγ di lmeḥnat
aḍar s wadda isḥeq

Rekkbent-iyi lexcawat
Ṛray-iw nufat
Ul-iw yebγa ad ifelleq

Yak Ṛebbi yeddem tifrat
Si lḥayat sselmet
Kulci yura deg sabeq

Si Tedmayt ar Buxalfa
Ṣsura-w tekfa
Ala azuγer deg iman-iw

Irekkeb-iyi lγec nerfa
Ṛrwiγ tilufa
Aqli-iyi ḥareγ di lεemeṛ-iw

Ziγemma tirga mxalfa
A lfahmin necfa
Ḍḥiγ-d d aγrib di tmurt-iw

Si Buxalfa ar Lbilaj
Uqmeγ lkuraj
I lmend n wid i yi-ẓran

Qesdeγ wid neḥwağ
Wama beni-sufağ
Am w’iğewzen s qeḍran

Tamusni-nsen am ṛrağ
Ssekreγ aṣehağ
Ttif xir win yettṛebbin iḍan.
Si Tizi-Wezzu ar Σedni
Ṣebreγ-as ayenni
Ṭtalabaγ di Saddat smaḥ

Mi ẓriγ lγaci d tirni
Ḥedd ur as-neni
D acu i d sebba n ṛwaḥ

Bixlaf wid yellan akk-a am nekkni
Ddbent lemḥani
Ma mmliγ-as lehduṛ n ṣseḥ

Si Σedni armi d Larbεa
Terkkeb-iyi lxelεa
D nek i inudan fell-as

Aqli-yi usiγ-d s ṭtaεa
Neqlaγ di lqaεa
Mkul ḥedd ḥkiγ-as

Tamurt-iw d lbidεa
Ffγen akk si cariεa
Abrid-a qeḍεeγ layas

[Si Larebεa ar Micli]
Tamurt yesnuzun aεeqquc
Ccnayed di leεṛuc
Si larbεa d assawen

Akken kesben akerruc
Nnefqa d lkkeruc
Ixliğen d Iceṛiḍen

At lğawi d ḥmimmuc
Aqellen di lewḥuc
Uγalen akk d lmexzen

[Di Micli]
At-an wul-iw yexjel
D ssfer-iw yeεjel
Micli ad γ-d-sini

Tamurt-a tura tbeddel
Wwin-tt zwamel
Wid-n keṛheγ zik-nni

Tamεict teṣεeb γef lefḥel
Teqqel-as d ifelfel
yeṛwa zzεaf d leγcani

[Aεenni γer Ccix Muḥend-U-Lḥusin]
A Ccix Muḥend-U-Lḥusin
Nusa-d ad k-nisin
Ul-iw irkkeb-it lγiḍ

A lbaz izedγen leḥṣin
Ilaq-ak wis-sin
At-a ikcem-iyi usemmiḍ

A Saddat heggit aεwin
Si Tizi akk-in
Tamurt ad tt-zedγen wiyiḍ