Amni [1] azzayri ideg llan 389 n yimaslaḍen [2] yettwafernen s 13 % n tikkin deg tfernin, yedγer kra n yileddimen i Wangal n tsekkirt taγarimt, tadeblant ; seg tama-s, Aseqqamu n Weγlan [3] ideg llan 144 n yimaslaḍen, gar-asen 48 i d-yesbedd Uselway n Tegduda, yeqbel ileddimen-a.

S wakka, asaḍuf wis 08-09 n 25/02/2008 yerzan Angal n tsekkirt taγarimt, tdeblant [4] ad iḥettem γef yimdanen akked tγawsiwin ad mmeslayen s taεrabt.

Deg umagrad wis 08 n usaḍuf-a, yura : « Tisekkirin akk d yigiten n teγdemt, yecban tuttriwin akk d tezrawin, yessefk ad d-ffγent s taεrabt, ma ulac ur ttwaqbalent ara.
 Ikaramen akk d tfertin ur nuri ara s taεrabt neγ ur nli tasuqqilt tunṣibt, ur ttuneḥsaben, ur ttwaqbalen.
 Iskasiyen [5] akk d umeslay n yibugaṭuten deg uxxam n teγdemt [6], yessefk ad d-ilin s taεrabt.
 Tiγtas yessefk ad d-ffγent s taɛrabt, ma ulac ad tent-yerr unezzarfu, s yiγil, ur ttwaqbalent ara”

Amagrad-a wis 08 d tarennawt n yiwen n wass n tselbi.

Deg wayen yerzan talγa [7] :

Tiderγelt n udabu azzayri tessaweḍ-it armi ur yeẓri ara asaḍuf-a, ur nettwaqbal ara, yeffeγ berra i uzref, imi tamendawt, asaḍuf amenzu, asaḍuf agejdan n tmurt, iga i tmaziγt aẓayer [8]n tutlayt taγelnawt.

Amagrad-a yeskan-d dakken tanaya swayes sfuğğuγen yibabiten n udabu d ayen ur nli anamek maḍi ; lemmer dγa deg-s kra n unamek, amek ara t-id-gen, imi ikaramen i d-iteffγen seg tssudiwin n Uwanek [9], yecban Aγlif n tlufa tiwerdanin, Aγlif n tlufa n daxel akk d tiyiḍ, ur ten-iqebbel, ur ten-yettaṭṭaf Uγlif n Teγdemt.

Amagrad-a wis 08 yeskanay-d tiẓraynutlayt n yiqeddacen n Uwanek (inezzurfa akk d yinwuriwen [10]) aya yeskan-d tikli n uzref n Lezzayer γer karaf (fehmet : uγen-t at temɛemrin), γas akken neẓra azref azzayri ihaw d nnesxa sari n uzref afransis iseg d-yettagem.

Deg udem n tsertit, asaḍuf-a yeqsed-d Leqbayel, ira ad asen-yerr tikumam deg tzeγwin akked yixxamen n teγdemt. Maca asaḍuf-a d targit, d alejlej, acku aγref aqbayli yerra-d lexber belli taleslalit-ines ur d-tettili ara alamma yerẓa leqyud aɛraben-inselmen swayes yettwarez.

Imesbuda, imγaren akked Buteflika d terbaɛt-is ur cfin ara ahat γef wayen i das-gan i Layla Zana, tamesbadut takerdit : ḥekmen fell-as s 10 n yiseggasen n lḥebs, acku temmeslay-d s tutlayt n tyemmat i yettwaḥerrmen deg lawan ideg yella Atatürk sdat Ugraw ameqqran n tmurt n Ṭerk ?

Seg useggas n 2002 γer da, tamurt n Ṭerk tuγal, s tmara ay rrant fell-as tmura n Lurup, teqbel takerdit, ass-a tuγal tettwaseqdac anda teddiḍ.

Iγerfan n umaḍal akken ma llan ttnadin γef tafat, γef tlelli, teddun d ufara. Lezzayer n Buteflika, nettat, tzedder deg temda n tallast n Tallit Talemmast. Maca, aya yettfu am yiṭij, mačči d nnkud n uγella n kra n ssef ara iregglen abrid i tikli γer sdat ideg yella yakan uγref aqbayli. Tiyiti n tmenγiwt i ira Butefliqa ad yefk i teqbaylit ur d-tettaweḍ sani.

Tamurt, ass n 13 deg maggu 2009