Aṭas i as-yeqqaren tuɛer tmaziɣt almi llant twaculin ttagadent ad tt-ɣren warrac-nsent, ahat d nettat ara yilin d sseba n lexsṣara, imi tuɣal taɣuri i yikayaden mačči i tmusni.

Segmi skecmen, ilindi, tamaziɣt ɣer yikayaden n BEM d win n BAC, aṭas n yinelmaden i d-yeqqaren yes-s i nerbeḥ. Tilawt d tizrawin i tt-id-yemmalen. Dɣa, newwet ɣer tewwurt ilaqen akken ad aɣ-d-fken igemmaḍ n tmaziɣt deg ukayad BEM.

Ad naf deg waṭas n yiɣerbazen anda iselmaden seqdacen ayen iwmi neqqar s tmaziɣt aselmed s yisenfaren [1], sawḍen ad sɛun nnig n 80 % n warrac iɛeddan 10 deg ukayad.Ad d-nefk amedya n yiɣerbazen : Ben Messaoud Rabia deg At-Mlikec (84,53%) ; Internat deg Uqbu (90,02%) ; Frères Guenini Sedduq (80,01%) ; Irid Muḥend-Ameẓyan deg Ukfadou (94%) ; Awqas (89%) ; Adekkar (90,2%). Deg Tizi-Wezzu, yewweḍ ɣer 100% seg yinelmaden yesɛan nnig 10.

Aya yeskan-d azal n tmaziɣt deg uɣerbaz azzayri. Meɛna mačči d tamaziɣt-nni kan i yellan d ssebba. Kra yella kra yerna. Yella daɣen amek i tt-yesɣar uselmad. Iselmaden yesseqdacen aselmed s yisenfar, ur ssiɣzifen awal ɣef tjeṛrumt [2] d tseftit [3], ur smarayen ara ijerriḍen n tuqqna ɣef yinelmaden, sduqussen-d arrac ad walin s yiman-nsen ayen i yeḥwajen, d nutni i yettnadin.

Taγbalut DDK tamaziγt